التنمر

التنمر حقيقى ده حاجة بقت مقرفة فى مجتمعنا، ومش مجتمعنا بس، هى كمان فى مجتمعات تانية للأسف ويا ريتها بتبقى من الغريب بس، دى ساعات بتبقى من أقرب الناس لينا وزى السم اللي بيموت فينا بالبطيء. هى مع الأسف فطرة سيئة فى كتير من البشر، بتحسسهم بالقوة أو السيطرة أو النفوذ أو الأنتصار أما يقللوا أو يستهزأوا بغيرهم، يحسسوه أنه قليل وضعيف ويلعن اليوم اللي أتولد فيه والمراية تبقى عدوه الأول! وتخليه مع الأسف يكره نفسه على الرغم أنه معملش أى حاجة، و ده مش ذنبه، دى خلقة ربنا، تخيل بقى المتنمر ده بيخلى انسان يكره خلقة ربنا، أستغفر الله العظيم بس ده حقيقة فعلا، أنت أما بتستهزق أو بتتريق على شكل أو شخصية حد وتحسسه بالخذلان و يكره نفسه، أنت مش بتتريق عليه أنت بتتريق على خلقة ربنا، بتخلى أصعب كلمة على لسانه هى الحمد لله، بتخليه يكره الحياة والوجود وبتخليه يفكر فى الإنتحار عشان يسيبهالك ويمشى، أيوة بتوصل لكدة! ومفيش حاجة اسمها ده هزار أو شغل عيال حتى لو ما بين الأطفال، التنمر والكلمة اللي بتوجع حتى لو بهزار أو نكتة فى قاعدة بتجرح وبتوجع وبتأثر، أنت بتبقى متخيل أنه نسى زى ما أنت نسيت بس هو بيقعد طول الليل الكلمة ترن فى ودانه وبتأثر فيه وفى تفكيره وفى سلوكه وحياته عموما، أنت بتخلى إنسان يفقد الثقة فى نفسه و اللي حوليه وبتهز صورته فى عينيه، بتصعب عليه الأختبار والبلاء اللي ربنا مميزه بيه أكتر وأكتر، وكل ده ليه ؟! عشان تحس أنك قوى وظريف ومنتصر وتروح مبسوط، مبسوط لأنك أذيت حد تانى وجذبت ليك الأنتباه.

دى أنانية بكل معنى الكلمة...

يا ريت نفكر فى مشاعر غيرنا أكتر من كدة، يا ريت لو لقينا حد بيتعرض للتنمر منوقفش ونتفرج، ندافع عنه و نقف قدام اللي بيتنمر عليه لو هو مش قادر يدافع عن نفسه، الموضوع ليه أبعاد كتير جدا ومجرمين ومرضى نفسيين كتير كان السبب فى اللي وصلوا له اللي اتعرضوا ليه فى طفولتهم أو مراهقتهم من تنمر أو رفض من اللي حوليهم لأنهم بيبقى ببساطة شريط سينما قدام عينيهم مبينتهيش، لو لقيت حد بيميل للوحدة أو قاعد لوحده متقولش "سيبه ده إنسان/عيل متوحد،" حاول تخليه يقعد معاك أو معاكم ويجرب، حتى لو كان awkward فى الأول مرة فى مرة هياخد على الجو ويبقى واحد منكم وهتكسب فيه ثواب، محدش بيحب يقعد لوحده، وجرب مرة وأتنين وتلاتة، أصله من كتر اللي اتعرض له بقى حاسس بالاضطهاد والخوف وعدم الأمان، مش هيثق أنه ييجى ويقعد معاك أو مع شلتك من أول مرة، هيخاف تئذوه أو تتنمروا عليه، بس لو لقاك مُصِر مش هيشك فى نيتك، ده هيعلي ثقته فى نفسه وهيشجعه أنه يواجه و يبقى أقوى وميستسلمش، حاجة بسيطة بتفرق مع الانسان اللي مش واثق فى نفسه بسبب تنمر أو رفض أو إيذاء نفسى و بتساعده يبقى أحسن ويتقبل نفسه أكتر، يا ريت نحاول نسيب بصمة إيجابية فى حياة اللي حوالينا ونحترمهم ونساعدهم ونهون عليهم عشان نلاقي اللي يهون علينا ويحترمنا ويساعدنا و تبقى خطوة عشان نخلى المجتمع ده أفضل ومتقبل نفسه والاخرين بشكل أحسن.

ربنا خلقنا مختلفين، كل واحد فينا عنده نقط ضعف وقوة بتميزه عن غيره ولازم نحترم ده ونتقبل بعض بأختلافنا، ربنا مخلقش حدperfect

حتى ال diamonds

اللي بينقبوا عنها بيعرفوا إنها أصلية أما يكون فيها خدوش أو عيوب 

لكن لو كانت completely perfect

مبتبقاش أصلية ومميزة.

لازم نتقبل بعض وبعيوبنا ومميزتنا والاحترام يكون أساس العلاقات ما بيننا مهما كانت سطحية عشان نقدر نكمل وتكون حياتنا

أحسن من كدة!