التجربة الصعبة
التجربة البتكون خارج منها وبتقول،
"أصل محدش بيتعلم ببلاش،"
تجربة جارحة وقاسية ومؤلمة بكل تفاصيلها.
كل ما بتفتكرها قلبك بيتقبض والجرح بيتفتح تانى بعد ما كان قفل، وتملا عينيك الدموع وبتفتكر نفسك انك عدتها بس بتكتشف إن لسه أثرها جواك، ماراحش ولا حاجة.
التجارب دى البتشل حياتك، بتحسسك إنك عاجز وفاشل وملكش لازمة.
البتخليك تبص بصة جديدة على نفسك وعلى الحياة ككل.
بس عارف... لو جبت مليون شخص، مليون شخص جنب بعض، وأخذتهم بالدور وعيشتهم نفس تجربتك بكل تفاصيلها، تفصيلة تفصيلة، هتلاقى أن كل واحد رد فعله ومشاعره وأحاسيسه مختلفين تمامًا!
مفيش حد هيتشابه مع التانى؛ كل واحد هيبص على الموضوع من ناحية، كل واحد التجربة هتسيب فيه أثر مختلف عن التانى!
ده بجد وكلام علمي، أنا مش بفتي!
أنت عارف، ربنا ساب المليون دى والمليارات الخلقها وأختارك أنت عشان تدخل التجربة دى، صعبة ومؤلمة وجارحة، بس لها حكمة ما يعلمها إلا الله الخلقنى وخلقك!
أرضى متبقاش من المرضى، حب حياتك زى ما هى بحلوها ومرها وحاول تعرف الحكمة من البيحصلك وحصلك، مش يمكن حياتك تتغير؟!
بس نصيحة لوجه الله...
أوعى تكبت مشاعرك، أياك تحبسها جواك...
ربنا خلق مشاعر الحزن والغضب والألم علشان تعشها و تحسها، تواجهها بشجاعة وتتعامل معاها وتعالجها وتتخلص منها.
أنت عارف لو كبتها هتكون بتعمل ايه ؟
هتكون بتكون عقدة نفسية جواك، بتقفل الجرح بس مش على نظافة، زى ما تتعور جامد وتنزف ومتحطش مطهر، الجرح بيكون صديد، أهو صديد جروح المشاعر ده، سم بيجرى جوا عقلك وأفكارك ومبادئك، بيغير فيها للأسوء، و محدش خسران غيرك.
لو أحتجت بعد تجربة صعبة مساعدة متخصص، دكتور أو أخصائى نفسى، دى حاجة مش مخجلة بالمرة. أنا بكلم الرجالة على وجه الخصوص، ده ميقلش من كرامتك حاجة نهائيا ومش معنى أن أنت راجل متزعلش ومتيعطش، أنت مش إنسان آلي! ولو أحتجت لمساعدة متخصص، ملكش دعوة بحد، ومتخليش أى حد يتدخل فى شؤونك الخاصة!
وفى الأخر أتمنى أن كل البيمر بتجربة صعبة يعدي منها على خير وصدقنى كل حاجة بتعدي على رأى كايروكى وكل حاجة هتكون كويسة وأحسن، بس أهم حاجة تخرج من تجربتك مستفيد حاجة وتفهم نفسك أكثر ومتكررش نفس الغلطة المرة الجاية.