الرجولة السامة
الرجولة السامة اللي هى الToxic Masculanity
الموضوع ده موجود فى مجتمعنا من قديم الأزل لكن كان فى ستارة مغطياه وماحدش كان واخد باله منه! في مشكلة خطيرة فى مجتمعنا من زمان والحقيقة مابتتعالجش...
فكرة " الرجولة."
ايه هى الرجولة فى مجتمعنا ؟؟
بالنسبة لمعظم المجتمع للاسف الرجولة صوت عالي، عنف، عضلات، وأن الست تخاف من جوزها وأبوها وأخوها كأنهم دراكولا مثلا ولا حاجة. الشخط والنطر والدكتاتورية والتنمر وأن مهما مراته عملتله عشان ترضيه مبيقدرش ويسميها الغفر أو الحكومة ويروح باصص برة عادى جدا بدون أدنى إحساس بالذنب...
لكن هل فعلا هى دى الرجولة ؟!
الحقيقة لا!
دى اسمها ذكورية أو رجولة سامة اللي تطفى الست و بتسبب لها مشاكل كتير فى حياتها ، و للأسف بردو بنات كتير أتربت على كدة. إنها تترعب من جوزها و واجب عليها السمع و الطاعة...
بس الموضوع اللي بجد ميتسكتش عليه أن ناس بيتخدوا مثل و قدوة و معروفين يطلعوا فى التليفزيون و يبينوا أن ده عادى قدام الناس...
وبدون ذكر أسماء لما راجل كل ما مراته تكون عايزة تقول حاجة أو تتكلم يظغرلها و يقولها أنا راجل البيت و أنا اللي كلمتى بتمشى...
مفيش حاجة اسمها زوجين فى بيت واحد و حد كلمته تمشى. لازم نتحاور و نتشاور و نتشارك عشان نوصل للقرار الصح و السليم اللي ميحسسش الطرف التانى أنه مش راضى أو مش مبسوط و يفضل يراكم فى تراكمات لحد ما يتحول لبنى ادم تعيس و مش راضى عن حياته!
واحد تانى يتسأل سؤال و رده يكون "لو تخنت هطلقها ، أنا واخدها عربية سبور"...
أنا أسفة يا فندم بس الزوجة مش بضاعة أو وجهة بنتفاخر بيها. اللي يتجوز واحدة عشان شكلها أو لأى سبب غير شخصيتها المتوفقة معاه و بتريحه، يبقى شخص صطحى و معندوش أدنى معنى من معانى الرجولة!!
و الستات اللي بتكون متقبلة كل ده، و شيفاه الصح، و ده معنى الراجل بالنسبة ليها ، مع الاسف دى مش غلطتها ، دى غلطة المجتمع اللي ربى الاجيال على معنى خاطئ للرجولة!
الرجولة الحقيقة ، زى ما بيقولوا، أخلاق و مواقف، أن الراجل يدعم مراته و يشجعها إنها تبقى أفضل و ميغرش من نجاحها ، يحميها و يحافظ عليها ميبهدلهاش. أنه يحترمها و يقدرها و يفهمها. أنه يتشاور معاها فى كل تفاصيله لأنها شريكة حياته و هم الاتنين فى مركب واحدة. أنه يشيلها وقت الأزمة و يكون معاها مهما حصلها معنويا أو جسديا ، ميخلاش بيها فى وقت الجد ، يكون مسئول و عارفة ايه اللي ليه و ايه اللي عليه ، ميفتريش!...و فى أمثال كتيير للرجولة الحقيقة مش اللي بتتصدرلنا فى المجتمع...
و فى حاجات بجد المجتمع شايف إنها و عيب و متنفعش...
"Taboo من الأخر"
زى أن الراجل يعيط أما يضايق و يعبر عن مشاعره أو زى أنه يساعد مراته فى شغل البيت أو يشاركها فيه لأن مثلا ده بيتهم هم الاتنين و المفروض الاتنين يعتنوا بيه. و برده المرض النفسى ، هو عموما المرض النفسى لسه المجتمع مش متقبله للدرجة ، بس برده فى طيار فى المجتمع كدة شايف أن الست طبيعى تمرض نفسيا لكن الراجل لا !
و بيشوفوا أن الراجل اللي بيعامل السيدات معاملة كويسة فيها مودة و رحمة و تقدير و أحترام و أخلاص بيبقى "فافى أو ممشياه و مش راجل كلمته مسموعة فى البيت" ، مع أن ، ده المفروض يكون المعنى الحقيقى للرجولة!