حياتنا مراحل، بنعيش مرحلة وفجأة نلاقى نفسنا في مرحلة تانية بدون إنذار، حدث عشوائي بيحصل في مساء يوم ما، عادةً بيكون الثلاثاء، بتلاقي كل حاجة اتغيرت من حواليك، فجأة بقى مطلوب منك مسئوليات وعليك توقعات وبيقابلك تحديات، لو حد أول امبارح كان قالك عليها كنت هتضحك عليه وتسيبه وتمشى.
بس مش دي أصعب حاجة في الموضوع، الصعب فعلًا التغيير الجذري اللي بيتطلب منك في يوم وليلة عشان تسلك في المرحلة الجديدة، ساعات بيكون تغيير للأحسن مش شرط للأوحش، بس الفكرة إنك تستوعب إن خلاص، سذاجة وسلاسة حياة الماضي مبقاش لها مكان، لازم تخلي بالك وتصحصح وتستوعب الدروس اللي بتقابلك عشان تعرف تتطور وتطلع خطوات لقدام.
بس ثواني، هل معنى ده إن الغلط مش مسموح؟ طبعا لا، اللي قالوا الغربال الجديد له شدة، وكل حاجة في أولها صعبة، مكدبوش، هتغلط مرة واتنين وتلاتة لحد ما تتعلم وتتعود، بس للأسف هيكون في عواقب، ويمكن هتكون قرفان وزهقان وناقم وعايز ترجع لحياتك القديمة، مع إن ممكن يكون في إيجابيات كتير بس عينيك بتكون رافضة تشوفها.
و بعدين في يوم هتصحى، تلاقي نفسك اتبرمجت وتقبلت الواقع وتعايشت معاه، عارف هتعمل إيه، والمواقف خلاص بتتكرر بمختلف ظروفها. وفي رحلة التغيير دى، جانب جديد تماما بيتخلق جواك، غالبا انت بتتخض منه في الأول، لأن عمرك ما قابلته ولا كنت تتخيل إنه مستخبي جواك، بيكون ثمنه إنك تتخلص من جزء من نفسك القديمة.
لحد ما بتوصل لمرحلة إنك بتبص لنفسك في المراية ومتعرفهاش، فتسألها: "هو إيه اللي حصل؟"
