المواجهة
كتير مننا بيكون نفسه إن يكون عنده الشجاعة الكافية و يواجه، يبقى عنده الشجاعة الكافية ويقول اللي حاسس بيه، يقول اللي بيدور فى باله ومحيره، يكون عنده الشجاعة الكافية إنه يقول لا، أو حتى يكون عنده الشجاعة الكافية إنه يواجه نفسه...
بس على فكرة، المواجهة فعلا شيء صعب، كتير بنفضل نحضرله و نرتب الكلام و نقول خلاص، هواجه المرادى، وتقف كدة قد الموقف ومتقدرش تنطق بكلمة، و ممكن ده بقى خصوصا لو هتواجه بحاجة مضيقاك يخليك تضطر تفوت وتعدى ومعلش المرادى ومحصلش حاجة المرة اللي فاتت، لحد ما فعلا بتوصل لمرحلة تحس فيها إنك عاجز ومش عارف تعمل حاجة...
كتير من الاوقات بنأخر المواجهة عشان بنكون خايفين نخسر الشخصية اللي هنواجهها أو بنكون مدركين إن بعد المواجهة دى عمر ما العلاقة دى هترجع زى الاول مهما كانت قوتها ومهما كان نوعها...
بس على فكرة، هو ممكن يكون ثمن غالى اه، بس فى مقابله هيكون فى سلام نفسى عظيم بعد المواجهة دى
اللي هو خلااااااص
مفيش حاجة زعجاك، مفيش حاجة قلقاك، مفيش حاجة مخبيها جواك تانى !!
كله بقى واضح ومش مضطر تتصرف تصرفات مش على هواك أو تمثل حاجة عكس الحقيقة اللي جواك، ممكن تزعل شوية، تزعل كتير
بس فى الاخر حتى لو العلاقة بينك و بين الشخصية دى اتأثرت أو ضعفت ، أنت هتدرك مع الوقت إن ده كان فعلا الأحسن ليك من الاول وأنت كنت بتضحك على نفسك، و نادرا، بس بتحصل، خصوصا لو الاهل، العلاقات دى بتقوى مبتضعفش ،
و تبقى مريحة أكتر بكتير من الأول لأن كل حاجة بقت واضحة من غير تزييف ومن غير بذل أي مجهود...
هو موضوع صعب، صعب جدا، بس السلام النفسى والصح يستحقوا إنك تعمل عشان توصلهم أي حاجة مهما كانت شبه مستحيلة
وصدقنى، أنت لو علاقتك بالشخصية اللي هتواجهها كانت صادقة و حقيقية ده بيحسن كتير منها حتى لو حصل اضطرابات فى الاول أما لو ضعفت أو خسرت الشخصية يبقى هى فعلا مكنتش حقيقية وحياتك هتكون حقيقى أحسن من غيرها و من غير المجهود الجبار الل انت بذلته عشان متواجهش وتحافظ عليها ،
و فعلا، مفيش فى حياة الإنسان أفضل من الصراحة والشفافية و الوضوح...